الثلاثاء، 13 مارس، 2007

تخاريف


دخل إلى المكتب متجهما عبوسا على غير عادته فقلت له مالك ، قال حزين يا أخي ماللى شفته على قناة المحور أمس ، قلت وايه هو اللى شفته قال إعدام الأسرى المصريين فى سيناء بعد الهزيمة كانوا عاملين زى الوحوش وكانهم مقبلين على مكأفاة مش على الموت ، قلت له متزعلش اوى كدة مأحنتا كلنا أسري ، وبنموت من غير منحس بأى مكافأت ، الغريب فى الموضوع أن الصحافة بتاعتنا بتعاملنا كأننا فى الروضة وخلوا فنجادا على القمة بعد ماتش أثيوبيا اللى فاز فيه المنتخب الأولمبى 4/0 طيب نستنى لما نلعب ماتش كوديفوار أكيد هيحصل بلاوي فى النقابة لأنهم معلقين يافطة كبيرة - شفتها وصورتها بالموبايل وانا ماشى أمبارح فى شارع رمسيس - مكتوب عليها الاوضاع المقلوبة الجاسوس يحاكم أمام المحاكم العادية والاصلاحيون الشرفاء يحاكمون أمام المحاكم العسكرية طيب المحامي اللى بيدافع عن الجاسوس من منتمي للنقابة وعارف كل المحاكم ، على فكرة سمعت أن المحاكم الاسلامية فى الصومال هتعمل أتفاقية مع القوات الحكومية بعد أنسحاب القوات الاثيوبية من الصومال ، وأثيوبيا نزلت الماتش فى استاد المكس بالاسكندرية بدون خبرة والحظ لعب مع المنتخب المصرى النه سجل مبكرا ، وسمير زاهر قعد يعنى بعد الماتش ارقص ... يا حضري ، اظاهر دور البرد اللى كان عندى خلاني أخرف شويتين حتى الدكتور اللى رحت له أمبارح قال يابنى ده مش برد ده التهاب فى الحلق ، ايوة يا دكتور التهاب فى الحلق يعنى برد بلغتنا احنا يا عيانين ، وطبعا زوجتى الفاضلة مش مصدقة أني عيان وبسلبط عشان ازوغ مالحفلة اللى المفروض هتعملها اليوم بمناسبة الذكرى الثانوية التاسعة لكونى زوجها ، بش مفيش مانع مالحفلة بالمرة العيال يفرحوا وكمان مفيش مانع اقولها كل سنة وأنت طيبة يا ست الكل وكمان بوسة كبيرة على جبينها يمكن تتعدي منى وتعرف أني مبسلبطش

هناك 8 تعليقات:

بعدك على بالى يقول...

الاول: الف مليون سلامة وان شاءالله الحكومه وكبيرها يجيلهم انفلوانزا الطيور مش بس برد...يمكن ينصلح حالنا لما يغوروا فى الف ..

ثانيا: كل سنة وانت والمدام فى خير وسعادة علطول يارب وعقبال العيد المئوى بعدها تاخد افراج علطول

تحياتى على البوست الجميل ده والتداخل العبقرى ،،، هو البرد بيعمل كده فعلا، يعنى بيخلينى نكتب بدم خفيف وروح ساخرة كده؟؟؟

حــلم يقول...

حلوة هلوسات البرد
دايما متميز حتى وانت عيان
:)

سلامتك بجد.. الف سلامة.. وكل سنة وانت والمدام طيبين ..وبلاش تعديها حرام عليك
:)

حاول تفتكرنى يقول...

بعدك على بالى
مين اللى هياخد أفرا ، أفراج يعنى ، أكيد هي

احنا حياتنا كلها أصبحت برد ، أو تداخل ، او اى حاجة مش مفهومة بس فى الاحر بنلاقينا فاهمين
احيانا بيقولوا بنفهمها وهي طايرة ، أحنا بأة بنفهمها قبل متطير
تحياتى

حاول تفتكرنى يقول...

حلم
مجرد فنتازيا قلم
بعض من اتجاهاتك البناءة فى موضوعاتك المتعددة

تحياتي

ادم المصري يقول...

الف الف الف مليون سلامة
وانشالله الحكومة واعوانها

وعقبال ما تتم عامك الخمسين يارب وتعمل حفلة برده

تحياتي ليك

moorgen يقول...

الف سلامة
بس متأكد ان دا م البرد
بس ان شاء الله البرد هايروح بس هاتفضل اللى بتقول عليها فانتازية قلم

كل سنه وانتو طيبين

حاول تفتكرنى يقول...

آدم المصري
الحكومة عندها برد مزمن والدليل أنها دايما عيانة وبتقاوح

شرفت فى زيارتك الأولي



مورجن
الحمد لله البرد راح من زماااااااان
والفنتازيا موجودة أحسن مانطق

تحياتي

غير معرف يقول...

滿.......................................................