السبت، 3 مايو 2008

مين هيكتب التاريخ


منذ دقائق شاهدت – بالصدفة - برنامج على قناة الجزيرة أسمه على ما أعتقد ( مدونون بدرجة صحفيون ) تناول البرنامج المشاهد التي لا نشاهدها إلا فى القنوات غير المصرية ، لان الاعلام عندنا توقف عند أقدام فيفي عبده ، ونبرات نانسي عجرم
ما ضايقنى من البرنامج أني شعرت للحظة أني بعيد عن مصر ، فالعمل خارج مصر لا يترك لك وقتا للمتابعة ، وإن تابعت تشعر بأنك كالهارب من ميدان المعركة تاركا من خلفك يعانون وحدهم ، وأنك بعيد عن صفوف الصفوة التي على عاتقها تنهض المجتمعات .


فهل حقا انا بعيد ، هل حقا أني انوي إلا أعود لمصر ثانية ، مع أني ازروها كل شهرين

وما حركني فى البرنامج هو حبى وعشقي للتاريخ ، وأذكر أنها المادة الدراسية الوحيدة التي حصلت على درجتها النهائية فى كل المراحل الدراسية فى حياتي
تري من كتب لنا التاريخ ؟
تري ماذا سيكتب التاريخ عن أحداث هذه الحقبة
ماذا لو تخيلنا ثورة القاهرة الأولي ضد بونابرت حدثت اليوم ، لان بونابرت فرض الضرائب ، ترى كم ضريبة يدفها الشعب المصرى تعرفوا أن ثورة القاهرة الاولي لم تخلف وراءها قتلة ، تر كم حكم بالاعدام وكم تهمة بالخيانة وقلب نظام الحكم ستلصق بكم مليون من الشعب المحروق
حاسس أن نابليون ده كان غلبان اوي ، ومكنش عارف اصول اللعبة ، عشان كدة محكمش فرنسا كثير ، يدوب 15 سنة بس ، بذمتكم ايام نابليون مش ارحم ، من مليون ضريبة بنكعها عمال على بطال
حتى ثورة عرابي ، لما راح على عابدين عملوا – اضراب – أمام قصر الريس بتاعهم ، حاسس أن كتب التاريخ كانت بتكذب لما قالت انه قال لقد خلقنا الله احرارا ولم يخلقنا عبيدا أو تراثا ، ازاى والشعب المصري كله عبيد والحكومة بتبيع وتشتري فيه ، تخيلوا لو حد راح عمل اعتصام فى شارع الميرغني بزمتكم مش هيموت فيها العملية دي مش أقل من الف واحد ، وكمان الورثة مش هيعترفوا انهم ( مخبولون عقليا ) مش ايام الريس اللى استعان بالانجليز أرحم على الاقل مكنش فيه ايامه امن دولة
بلاش كل ده
فاكرين فيلم ارضنا العطشانة نرويها بدمانا ، والناس اللى راحو فى داهية عشان الاقطاعي محمود بيه عاوز يعمل السكة الزراعية ، كل اللى حصل فى الفيلم ده عشان محمود بيه واحد ، طيب مين يقولي كام محمود بيه موجود دلوقتى ، ده محمود بيه ، وعز بيه ، وسرور بيه ، ممدوح بيه ، وحبيب بيه ، لأ حبيب ده باشا وبيه مع بعض ده غير البشاوات والبرنسيسات ، ده حتى مندوب الشرطة بأة من مراكز القوة ، وشغلانته أنه يلم الاتاوات من سواقين المكروباس والل ليه مصلحة فى أى قسم بوليس والتاكس بالتمام ذى ماستعان سليم الاول بالمماليك لما دخل مصر عشان بيعرفو ازاي يلمو الاتاوات وعلى رأى حمدي غيث فى فيلم التوت والنبوت ( الاتاوة دي طاعة ) يعني برضه تاريخ



فاكرين حادثة دانشواي لما اتنين انجليز اصطادوا فلاحة مصرية بدال ما يصطادوا الحمام ، والفلاحين هما اللى طلعوا غلطانين عشان الانجليز مبيعرفوش ينشنوا ، طيب اهو الشرطة الفالحة اصطادوا تلاتة فى المحلة عشان برضو مبيعرفوش ، ذى ما يكون الفلاحين دول مكتوب عليهم الموت بنيران عدوة ونيران صديقة

ولا مظاهرات الطلبة لما فتحوا عليهم كوبري الجامعة ايام النقراشى باشا ، دلوقتى الطالب اللى ببنطق حرف من حروف – مظاهرة – بيفتحوا عليه هو وأهله واللى معديين من امام بيتهم البحر الاحمر المتوسط



استحلفكم الله ، كيف سيسجل التاريخ هذه الايام ، ما المسمي الذى سيسمي به امن الدولة ، والمباحث والمخبرين والمعتقلات ، والهراوات ، وقلة الأدب ، الجوع والمرض ، والفقر والاهانة ، وقلة القيمة
بماذا سيطلق التاريخ عن اللى ماتوا فى المحلة ، ومظاهرات الطلبة ، والناس اللي استجنوا ظلم لانه نطقوا .
مش ممكن تكون دي ديمقراطية ، مش ممكن تكون دى إنسانية ، مش ممكن تكون دي بلد
مصر بالطريقة دي مش بلد ، لكنها ستبقي وطن

احب بلدي ن أحب وطني ، أحب إلا أهرب من الدفاع عنها ، وأحب كل ذرة فى كيانها ، لكنى أفضل أن ابقى كما انا بعيدا عنها ليس كرها فيها ، بل لأني اعيش هنا إنسان
بكل ما تحمله الكلمة من معان
بس هيفضل سؤال
مين هيكتب التاريخ
احنا ولا الحكومة ، ولا القنوات الفضائية ، ولا وزارة الداخلية
ولا هنسيب تاريخنا يكتبه غيرنا

هناك 20 تعليقًا:

Bella يقول...

مش عارفة ابتدي منين؟؟

مفروض اذا اردنا ان يصل تاريخنا لمن يأتي بعدنا غير مشوه ولا مكذوب ان نكتبه

وكيف نكتبه؟؟

نكتبه بأن نصنعه ونشارك فيه
فمن يفعل يسجل افعاله

ومن يكتفي بالفرجة لاتتذكره الايام ولا تسجل عنه شيئ

يجب الا نتركهم يسجلون عنا حتى لايصل تاريخنا مغلوطا كما وصلنا تاريخ السابقين علينا


موضوع جميل ويحتاج لنقاش كثير

تحياتي

حاول تفتكرنى يقول...

Bella
صحيح مين هيكتب التاريخ
أحنا !!! فيه ناس بتحاول
وناس ماتت وهي بتحاول
وناس اتسجنت وهي بتحاول
وناس استخبت بتحاول

وكل المحاولات مشاركة
وكل حرف مكتوب مشاركة
من هنا لن يستطيع أحد تزويره

رغم كل المحاولات
علمنا التاريخ ان المحاولات دائما تنجح
حتى لو لم يراه أول من بدْهذه المحاولات

تحياتي وشكرا على التفاعل

عـــفـــراء يقول...

السلام عليكم ورحمة الله وبركاتة
من خلال كلامك فهمت انك عايش برة مصر
اولا ربنا يرجعك ليها بالف سلامة
ثانيا لاتتمنى شئ من المستحيل فنحن نعيش وكاننا على هامش من الذكريات
فتاريخنا نحتفظ به لانفسنا فقط لكى يذكرنا يوما انها فعلا بلدنا الحبيبة مصر

عاجبنى اوى البوست اللى فات وكان نفسى ادخل اعلق علية بس واضح انى اتاخرت بس هدخل اعلق علية دة لو ماكنش عندك مانع طبعا
خالص تمنياتى لك

حاول تفتكرنى يقول...

عفراء

تحياتي لقدومك

المستحيل كلمة نلمسها ، ولكن كل الممكن كان مستحيلا فيما مضى

الايام تمضى ، وما لا نشعر به قد يشعر به غيرنا
فقط
سنكون جزء من هذا التاريخ

سلوى يقول...

مين هيكتب التاريخ
احنا ولا الحكومة ، ولا القنوات الفضائية ، ولا وزارة الداخلية
ولا هنسيب تاريخنا يكتبه غيرنا

سؤال فعلا مهم

هو في كل الأحوال هيتكتب
بس المشكله
هيتكتب إزاي؟؟؟

إن شاء الله ترجع لبلدك بالسلامه

بوستك جميل
ويحتاج لمناقشات كتير

حاول تفتكرنى يقول...

اهلا سلوي
شفت ردك أمس أثناء تصفح المدوة بالموبايل
وطرأت فكرة على دماغى
عارفة مين هيكتب التاريخ
التاريخ هو اللى هيكتب نفسه
وهيكشف أى حد بيحاول يزوره

تحياتي

سمراء يقول...

يقول التاريخ ان الملك العظيم رمسيس الثاني قد قام بازالة اسماء من سبقه من ملوك من على انجازاتهم ونسبها لنفسه
وهكذا سيكتب التاريخ
انه ميراث من السلوكيات منذ ايام الفراعنة
ما كتب عن الظلم والقهر والموت والاهانه في التاريخ خاص فقط بايام استعمار مصر
اشكرك على مرورك
سمراء

حاول تفتكرنى يقول...

سمراء

لم يخجل التاريخ من وصف رمسيس الثاني بالفرعون اللص
لانه - كما اشرتي - نسب أعمال الآخرين لنفسه خاصة التماثيل

ولكن التاريخ لم يذكر لنا شىء عن هذه التماثيل


تبدل الحال كلية اليوم
فاللصوص لم تدع شىء يسرق
ومازالت التماثيل تشاهد

مرورك له طعم خاص
تحياتي

rona يقول...

زمان كان التاريخ بيكتب نفسه بس دلوقتى التاريخ هيكتبه الاقوياء ده هما كمان تقريبا كتبوا التاريخ وسيبينه وكل واحد عمله سيره ذاتيه وكاتب فيها بقى كأنه حرر مصر اهو احنا كمان بنكتب عشان التاريخ يفتكر البلد كانت عمله ازاى والحمد لله مدونات كتيره مبينه الحقيقه اللى لازم تكتب فى التاريخ

حاول تفتكرنى يقول...

rona
عندك حق
الاقوياء يكتبون التاريخ
لانهم يسيطرون على الحاضر
لكنهم لا يدومون
والتاريخ يدوم
فيكتب الحقائق دون تزييف

شرفت مدونتي
تحياتي

shaimaa samir يقول...

انا كانت كل مشكلتى
انى لمااكبر
واكون ام مثلا لاطفال
ولا جدة
وواطفالى يجو يقولولى ازاااى كنتو ساكتين ع اللى بيحصل
انتومكنتوش بتتكلمو
عايزة بقا ااقولهم اناعملت كذا وكنت ايجابية وده اللى الواحد بيحاول يعمله
اماعن تدوين التاريخ
فاكتشفت باخطاء فادحة
فى تاريخنا الذى كنا ندرسه
بيدونا اللى عايزينا همانعرفه

بوست رااائع

حاول تفتكرنى يقول...

شيماء
أكتشاف الاخطاء سهل لمن يقرأ ويحلل ما يقرأ ، ولكن الصعب هو اصلاحها ، لانك لن تملكى عقول الاخرين

قد تملكين عقول اطفالك - إن شاء الله - فى مهدهم فلا تعلميهم كيف يصلحون الاخطاء
بل علميهم فى البداية كيف يكتشفونها
وقتها سيصوبونها من تلقاء أنفسم

تحياتي

رحــــيـل يقول...

التاريخ ليس احرف تكتب فقط

وانما حكايات تتوراثها الاجيال

لذلك اعتقد انه لن يزور يوما فدائما ستظل الحقيقه واضحه وان حاولوا تزويرها

اما بالنسبه انك تفكر ترجع فاعتقد فعلا ان انت لخصت الموضوع انت فعلا بره عايش انسان

ربنا يوفقك

موناليزا يقول...

التاريخ مش هيكتب حاجة غير لما نكون خلاص انتهينا ويارب ننتهى على خير

حاول تفتكرنى يقول...

رحيل
لهذا سمي تاريخ

لانه دائما لا يقف ابدا
أمام كل محاولات تغير معالمه

تحياتي





موناليزا
حتى لو انتهينا
المهم ألا تنتهي الحقائق
مهو مش معقولة ننتهي أحنا والحقائق
وتبقي الاكاذيب
لابد ان يكون هنام وجه مشرق

تحياتي

امواج يقول...

تاريخنا هيتكتب هيتكتب
ومهما كان فيه حقائق لم تظهر فالزمن جدير على اظهارها
مصر هتفضل مصر
اجمل بلاد الدنيا
هنفضل نحلم فيها مهما حصل
فى بلادنا كتير مستهلوش يبقو فيها
وللاسف ال يستاهل حبها هو ال بيمشى منها
التاريخ هبتكتب صح صدقنى
تقدر تخبى اى شئ ووتألف اى شئ الا التاريخ
الحقيقه بتبان
مع الايام
بلادنا عدت بمراحل صعبه وقدرت تخرج منها
زى مانت قولت كان فيه ثوره
وانا انتظر ثوره
ال قدر يعمل زمان ثوره ويغير مصار بلد
يقدر يعملها تانى ويغير برده مصار البلد
مدونتك رائعه بالتوفيق

حاول تفتكرنى يقول...

أمواج
عارفة كل اللى كتب تعليق هنا
عنده نفس التفاؤل أن التاريخ هيكتب الصح ، ومصر هتوصل للصح ، والثورة هتكون صح ، ضد كل غلط

ومسار البلد هيتغير للصح ، بس بشرط أن احنا نبقي صح
لاننا اداوتها
وادوات التاريخ



مدونتك رائعة
تحياتي

Razi Soliman يقول...

بعد الكلام دا كله بتقول على نفسك انك هارب امال احنا اللى جوه البلد ومش قادرين حتى نتنفس فيها كلها يومين وهايبقى النفس بالبطاقه هو كمان
بس بردو بحبك يامصر ولو نقلوا منك الاهرمات والنيل ومسجد عمرو ابن العاص واقدم كنيسه فيكى هافضل احبك يامصر لانهم مش هايقدروا ينقلوا دموعى من على ترابك
التاريخ هايسجل حاجات كتير وكمان البحر الاحمر المتوسط
اول زيارة ليا عندك
الى اقرب لقاء
رازى

حاول تفتكرنى يقول...

رازي
قد ايه شعورك جميل
وقد ايه طالعة بصدق
اعتقد أنك خلصت كل الكلام
على الاقل الترايخ هيكتب أحنا بنحب مص قد ايه
تحياتي

shaimaa samir يقول...

اتمنى قراءة ردى على تعليقكم افى بوستى الاخير
ان كان لك رد او توضيح

جزيت الخير